Birgir Leifur: „Fyrsti keppnisdagurinn fór alveg með möguleika mína“

„Fyrsti keppnisdagurinn fór alveg með möguleika mína. Ég púttaði 40 sinnum, var með 5 þrípútt og sjálfstraustið var ekki mikið. Ég gaf aldrei upp og fann taktinn aftur í púttunum, en ég náði ekki að nýta þau færi sem ég kom mér í,“ sagði Birgir Leifur Hafþórsson við golf.is eftir að hann féll úr leik á lokaúrtökumótinu fyrir Evrópumótaröðina á Spáni. 

Lokastaðan: 

Birgir lék fjórða hringinn á -2 eða 68 höggum en það dugði ekki til og endaði hann á +3 samtals (74-72-73-68). Þeir kylfingar sem náðu að vera í einu af 70 efstu sætunum leika tvo hringi til viðbótar og að þeim loknum fá 25 efstu keppnisrétt á Evrópumótaröðinni. Birgir endaði í 106. sæti af alls 156 kylfingum sem komust inn á lokaúrtökumótið á PGA Catalunya á Spáni.

Hann var ánægður með margt í leik sínum og þá sérstaklega sláttinn með járnunum. „4-járnið var í uppáhaldi, ég var þrisvar nálægt því að fara holu í höggi með því járni. Annars er þetta súrt að ná ekki lengra, en á þessu getustigi þá kemst maður ekki upp með það að pútta eins og ég gerði á fyrsta hringnum. Það fór með möguleika mína.“ Birgir vill nota tækifærið og þakka fyrir þann stuðning sem hann hefur fengið á þessu tímabili. „Ég vil þakka vini mínum Inga Rúnari Gíslasyni fyrir aðstoðina á lokamótinu sem kaddý. Forskot afrekssjóður og GKG hafa stutt mig ómetanlega, og síðast en ekki síst fá elskuleg eiginkona mín og börn þakkir fyrir endalausan stuðning og trú á mér.“

Myndirnar hér fyrir neðan eru frá Inga Rúnari Gíslasyni, sem var aðstoðarmaður Birgis í þessu móti: